توزيع المدنيين المحكومين عسكرياً على سجون الداخلية
خلص كلامنا اللي بالمفتشر، لكن بالمفتشر وبصريح العبارة برده هنبدأ بآخر أخبار بلدنا.. وأول أخبارنا_والله ما أنا عارفة إن كان خبر حلو ولا مش للدرجة ديه_ الخبر أعلن عنه مصدر عسكرى مسئول _ما ذكرش اسمه_ لوكالة أنباء الشرق الأوسط، أكد فيه هيئة القضاء العسكري قررت نقل وتوزيع كل المسجونين المدنيين المحكوم عليهم بأحكام عسكرية من السجن الحربى في الهايكستب على طريق مصر الاسماعيلية الصحراوى للسجون التابعة لوزارة الداخلي، مع التأكيد في نفس الوقت على إن دة مش معناه بأي حال من الأحوال تحويل الأحكام الصادرة ضدهم من القضاء العسكرى إلى القضاء المدنى.
بلدنا بالمصري: حملات " لا للمحاكمات العسكرية للمدنيين "
بمناسبة المحاكمات العسكرية للمدنيين، كان فيه ظاهرة بيتهيألي إنها إيجابية.. إنه كان فيه كتير من رسايل التهنئة بالعيد السنة ديه، كان ختامها بعد المعايدة وكل سنة وانتو طيبين وبعودة الإيام بالخير واليمن والبركات وكدة...، عبارة: " لا للمحاكمات العسكرية للمدنيين".. الحقيقة أنا مش عارفة مين صاحب الفكرة ولا إيه مصدرها_يمكن تكون حملة على تويتر أو على فيس بوك، وممكن تكون مبادرة شخصية وانتشرت_ لكن أياً كان، فغالباً معناها إن الرفض الشعبي للمحاكمات العسكرية للمدنيين بعد الثورة، كل مادى ما بيزيد وبياخد أشكال مختلفة.. من ضمن الأشكال ديه كمان، الحملة اللي بدأتها على يوتيوب، من أواخر رمضان تقريباً مجموعة "لا للمحاكمات العسكرية للمدنيين".. بكرة إنشاءالله هنتكلم بالتفصيل عن الحملة والهدف منها والنتايج المتوقعة من وراها، وبالتأكيد هنحاول نجاوب على سؤال ليه "المدنيين ما ينفعش يتحاكموا عسكرياً حتى لو كانوا بلطجية وقتالين قتلة".. بس لحد ما ييجي بكره خلونا نشوف جزء من حملة " لا للمحاكمات العسكرية للمدنيين"
بلدنا بالمصري - بالمفتشر: البركة في الصينية
فبالمفتشر كدة وعلى بلاطة وبالفم المليان، وقبل ما نقول يا هادي يا رب بآخر أخبار بلدنا، احنا نفسنا بس ومنى عيننا حد يدينا عقله ويبقى كتر ألف خيره لو يقول لنا إلا هي إيه الإنة والقصد والنية من ورا الصينية؟!!! يكونش خير اللهم اجعله خير فيه عمل كدة ولا كدة معمول تحت عتبة الميدان على ورق الخيار، يسهر قوات حفظ الصينية بالليل ويضحكنا ويبكينا بالليل وبالنهار!!! لأ والأكادة إنه لما كانت الصينية براح وتساع من الحبايب ألف، قالك وسع يا جده انت وهو من قدام عجلة الانتاج ما توقفوش المراكب السايرة بالمقلوب، ورونا عرض كتافكوا ونقطونا بسكاتكم بلا خوتة وكلام فارغ ولعب عيال.. أما بقة وقفة قوات حفظ الصينية كدة ددبان، فيا سلم، على القلب زي العسل، حاجة تشرح القلب وترد الروح وتخلي العجلة تلف كدة وتدور فريرة ورهوان عمال على بطال حاجة ما فيش بعد كدة.. أما السياحة بقة، فيا وعدي، آشيتها هتبقى معدن وميت فل واربعتاشر والبركة في الصينية وبالهنا والشفا ومترح ما يسري يمري والسلام أمانة وحياة الغاليين لأخينا اللي ما يتسمى الانفلات الأمني، طول ما احنا سايبين البيت يضرب يقلب وقاعدين في الصينية!!! وعجبي!!!
بلدنا بالمصري: ثاني جلسات قضية فتنة إمبابة
النهاردة كانت الجلسة التانية في القضية المعروفة ب"فتنة امبابة"، والمتهم فيها 48 شخص قدام محكمة جنايات أمن الدولة العليا طوارئ.. صحيح إن الصحفيين ووسائل الإعلام اتمنعوا من التغطية بقرار من رئيس المحكمة بعد مشادة بينه وبين هيئة الدفاع عن المتهمين.. بس احنا برده قدرنا نرجع من هناك بالتقرير اللي جاي.
وقفة أمام سفارة السعودية احتجاجاً على إهانة المعتمرين
اللي حصل للمصريين اللي كانوا راجعين من العمرة أواخر رمضان، في مطار جدة لا يسر عدو ولا حبيب.. صحيح إنها مش أول مرة_ بس يمكن أول مرة بالصورة المهينة ديه_، وصحيح إن فيه لجنة تحقيق مشتركة تم الإعلان عنها لتحديد المسؤول أو المسؤولين عن اللي حصل.. لكن كرامة المصريين اللي المفروض إنها فوق كل اعتبار واللي بيتسكت عليها قبل الثورة ما عادش ينفع يتسكت عليها بعد الثورة، وخصوصاً إن السفير السعودى حمل المعتمرين المصريين المسؤولية الكاملة عن الفوضى اللي حصلت
بلدنا بالمصري: التحقيق مع يوسف والي ومحاكمة زكريا عزمي
لسة مع المحاكمات -اللي برده مش عسكرية- والتحقيقات مع رموز النظام السابق المتهمين في قضايا فساد وإهدار مال عام وكسب غير مشروع أشكال وألوان.. أبطال التحقيقات والمحاكمات النهاردة كانوا: الدكتور/ يوسف والى وزير الزراعة الأسبق المتهم ببيع أرض محمية جزيرة البياضية لرجل الأعمال حسين سالم _طبعاً_ بالمخالفة للقانون. والدكتور زكريا عزمي اللي هتبتدي أول جلسة من جلسات محاكمته قدام محكمة الجنايات للكسب غير المشروع يوم 24 اكتوبر اللي جاي.
بلدنا بالمصري: اعتصام مفتوح للنوبيين أمام محافظة أسوان
النهاردة بدأ مجموعة من النوبيين اعتصام مفتوح قدام ديوان عام محافظة أسوان.. اللاعتصام بدأ ببيان من عشر مطالب من أول حق العودة لحد تدريس الحضارة النوبية.. وانتهى بحريقة.
http://www.youtube.com/watch?v=u55_4gD7LjU
بلدنا بالمصري: جدار عازل أمام السفارة الإسرائيلية
دلوقتي أهالي الحي اللي فيه السفارة إياها في العمارة، صحيوا امبارح الصبح خير اللهم اجعله خير على المنظر اللي هنشوفه حالاً بدون تعليق، لحد بكرة هيكون لنا عنه كلام كتير و"بالمفتشر"
بلدنا بالمصري: محامون كويتيون يردون جميل مبارك غداً
طيب بمناسبة بقة المحاكمات_اللي مش عسكرية للمتهمين بقتل الثوار_ زي ما حضراتكوا عارفين، بكرة الجلسة التالتة من جلسات محاكمة الرئيس المخلوع وولاده ووزير داخليته وأعوانه بتهمة قتل الثوار وغيرها من التهم المتعلقة بفساد مالي واستغلال نفوذ وإهدار مال عام وخلافه.. وزي ما حضراتكوا برده عارفين إن ديه أول جلسة مش هنقدر نشوفها بعينينا لا على الهوا ولا حتى مسجلة لإنها حتى مش هتتصور، بقرار من رئيس المحكمة المستشار أحمد رفعت اللي أكد إن القرار دة "للمصلحة العامة"، فكل اللي هنقدر عليه بكرة احنا كوسائل إعلام إننا هننقلكوا اكبر قدر ممكن من شهادات وحكايات الصحفيين والمحامين وشهود العيان على الجلسة، لكن صوت بس من غير صورة... بس دة مش الجديد الوحيد في جلسة بكرة، فيه تفاصيل تانية جديدة هنتكلم عنها باستفاضة في فقرتنا التانية.. لكن من ضمن الجديد كمان، إن فيه وفد من المحامين الكويتيين جايين مخصوص عشان يدافعوا عن الرئيس المخلوع، "مش لشخصه لكن من باب رد الجميل على موقف مصر مع الكويت خلال الغزو العراقي" على حد تعبيرهم.. لكن لحد دلوقتي لسة مش واضح مدى قانونية حضورهم عن الرئيس السابق، وهل حصلوا على التصاريح الخاصة بحضورهم ومين الجهات اللي المفروض تمنح التراخيص ديه، اسئلة كتير إجاباتها لحد دلوقتي متضاربة ومتناقضة.. بس هنحاول نستوضح الأمور قدر المستطاع أولاً من:
بلدنا بالمصري: قراءة في قانون الدوائر الإنتخابية
من ساعة ما تم الإعلان عن قانون تقسيم الدواير الانتخابية الجديد، اللي أقره مجلس الوزرا واللي المفروض يصدر بمرسوم من المجلس العسكري في أي لحظة، والناس واقعة في حيص بيص سواء من طرف اللي هيترشحوا أو من طرف اللي هينتخبوا، وفي الحالتين كله "بيصوت": (بيدلي بصوته يعني عشان ما حدش عقله يروح لأبعد من كدة)!!! فاحنا هنقول يا هادي يا رب وهنحاول نفك طلاسم القانون الجديد وهنستعين على الشقا بالله وبضيوفنا النهاردة:
- الكاتب الصحفي/ محمود مسلم: مدير تحرير المصري اليوم
- الدكتور/ مجدى عبد الحميد: رئيس الجمعية المصرية للنهوض بالمشاركة المجتمعية
-الأستاذ/ محمد العجاتي: المدير التنفيذي لمنتدى البدائل
إستعدادات دفاع ضحايا الثورة لثالث جلسات محاكمة مبارك
بكرة جلسة جديدة من جلسات محاكمة الرئيس المخلوع وولاده الاتنين ووزير داخليته واعوانه بتهمة قتل الثوار وخلافه.. مع الوضع في الاعتبار اننا محرومين بقرار من رئيس المحكمة من رؤية طلعتهم البهية في القفص ورا القضبان.. إيه اللي المفروض يحصل بالظبط في جلسة بكرة؟ وإيه اللي موغوش الناس أوي كدة من المحاكمة ديه كلها كدة على بعضها وابتداءاً من جلسة بكرة بالذات اللي ما حدش هيشوفها بالعين إلا اللي هيحضروا بنفسهم؟ وهل القلق دة في محله ولا مبالغ فيه، هو دة اللي هنعرفه من ضيفنا النهاردة أ. أمير سالم أحد المحامين عن المدعين بالحق المدني من المصابين وأسر الشهدا
بلدنا بالسمنة البلدي في ضيافة بلدنا بالمصري
صحيح إن رأي المثل إنه: "يا بخت من بكاني و بكى الناس علي ولا ضحكني وضحك الناس علي"!!! لكن دة مايمنعش إنه أحياناً ممكن يكون كمان يا بخت من ضحك الناس علي، المهم إنه ضحكني وضحك الناس في وقت كنا بنترجى فيه ضحكة من القلب رغم المحنة ومر الكاس. ودة اللي قدر يعمله بشهادة الكل: فريق "توك شو تكنوقراط" اللي كانت بيتذاع طول شهر رمضان على قناة موجة كوميدي، واللي نابنا منه جانب لا بأس بيه أبداً وبالسمنة البلدي كمان.
- ياسر الطوبجي: حسني مبارك- أحمد شفيق -- إبراهيم عيسى- القذافي- عمرو أديب
- أحمد الحلواني: علاء الأسواني
- إسلام: ريم ماجد -- نجوى كرم
- سعداوي: نجيب ساويرس- سيد علي
ليست هناك تعليقات:
إرسال تعليق