برنامج بلدنا بالمصرى تقديم ريم ماجد على قناة OTV حلقة الخميس 28/7/2011 يوتيوب كاملة
بلدنا بالمصري: احتجاجات كبيرة في ماسبيرو
بلدنا بالمصري: محاكمة مبارك ونجليه في أرض المعارض
قرار وزارة العدل اللي رسي أخيراً على مكان لمحاكمة الرئيس المخلوع وأولاده الاتنين ورجل الأعمال الهربان في أسبانيا لحد دلوقتي، وحبيب العادلي وستة من مساعديه بتهمة قتل الثوار يوم 3 أغسطس.. آخر المطاف رسي على مبني الهيئة العامة للاستثمار والمناطق الحرة في أرض المعارض في مدينة نصر. أما بالنسبة لرجل الأعمال حسين سالم، المحكمة الوطنية الأسبانية قررت تخفيض الكفالة المفروضة عليه من 15 مليون يورو ل5 مليون، وعلى ما فهمنا لحد دلوقتي إن الإجراء دة الهدف منه تسهيل تسليمه لمصر.
بلدنا : 6 أبريل تطالب النائب العام التحقيق مع أعضائها
بعد يوم واحد من إحالة بلاغ حركة كفاية ضد اللواء حسن الرويني قائد المنطقة المركزية، للنيابة العسكرية، حركة شباب 6 أبريل قدمت النهاردة بلاغ للنائب العام، بس بتطالب فيه بالتحقيق مع أعضاء مكتبها السياسي وهم: (طارق الخولي- شريف الروبي- عمرو عز- أحمد رفعت)، في الاتهامات اللي وجهها لهم اللواء حسن الرويني، بتلقي تمويل أجنبي والتخطيط لإثارة الفتنة والوقيعة بين الجيش والشعب.. وفي نفس الوقت، نظمت الحركة مؤتمر صحفي ردت فيه على نفس الاتهامات(تقرير)
بلدنا : متابعة لحالة حسين زكريا أحد مصابي الثورة
متابعة دقيقة جداً لحالة المصاب المصري حسين زكريا، اللي أصيب يوم 28 يناير وحالياً موجود في مستشفى في ألمانيا.. وبقى له هناك شهرين، صحيح عمل اكتر من عملية لكن كلها عمليات لقرح الفراش اللي سافر بيها من هنا من مصر، لكن العملية الأساسية اللي لازم يعملها في عموده الفقري لحد دلوقتي لا حس ولا خبر.. امبارح حاولنا نفهم على قد ما نقدر من اخوه والمرافق ليه الستاذ إبراهيم، لكن الحقيقة اننا خرجنا بعلامات استفهام اكتر بكتير من اللي بدأنا بيها.. وعلى ما يبدو إنه في حلقات كتير مفقودة في القصة ديه هنحاول نلاقيها مع بعض وبالهداوة لحد ما نوصل لحل ما ينفعش يكون إلا لصالح حسين زكريا
بلدنا بالمصري: روكسي تطالب بفض الاعتصامات
بما إن بكرة الجمعة، فخلونا كمان نطمن على أخبار روكسي وناس روكسي.. "ائتلاف الحركات المنظمة لمظاهرات روكسي" أصدر بيان النهاردة رفض فيه عمليات التخوين الشديدة اللي يتعرض لها المصريين سواء المؤسسة العسكرية، أو القضائية أو أي فصيل سياسي مصري.. وطالبوا كل الأطراف بتقديم مصلحة الوطن على الاختلافات و الرؤى السياسية، على اعتبار إن مصر في اشد الحاجه الان للتوافق الوطني والتوحد لعبور المرحلة الإنتقالية.. البيان بيعدد كمان المطالب اللي هيرفعوها في مظاهرة بكرة وهي: فض الاعتصامات فى جميع مياديين مصر والبدء في مرحله البناء ودفع عجله الانتاج لعودة الهدوء و انتظام حالة العمل/ البعد عن التفرقة بين القوات المسلحة و مجلسها الاعلى لانهما كيان واحد لا ينفصل/ ضرورة اعطاء الفرصة الكاملة لحكومة الدكتور عصام شرف و المجلس العسكري في الفترة الانتقالية/ محاكمات عادلة لجميع رموز الفساد و القصاص العادل.
لكن فيه ائتلاف
واحد من ضمن الائتلافات المنظمة لمظاهرات روكسي، قرر إنه مش نازل بكرة أصلاً ومش هيشارك في أي مظاهرة، والسبب الرئيسي حسب البيان بتاعهم هو عدم رغبتهم في إن المظاهرات تكون عادة أسبوعية.. ولإنهم شايفين إن مصر حالياً محتاجة لهدنةو إتزان وعقل رجلٍ رشيد... على حد تعبير البيان
بلدنا بالمصري: خطة هيئة تنشيط السياحة في رمضان
بما إننا نفسنا ومنى عيننا ترجع السياحة في بلدنا زي الأول وأحسن كمان بعد الثورة، تعالوا نشوف هيئة تنشيط السياحه ناوية على إيه خصوصاً مع دخلة رمضان.
بلدنا بالمصري: تجدد المخاوف من مليونية 29 يوليو
احنا امبارح كنا متفائلين يمكن زيادة عن اللزوم بمليونية بكرة، ودة مش معناه إننا اتشاءمنا بالعكس احنا لسة عندنا عشم كبير في إن مليونية بكرة ديه تكون بجد مليونية لم الشمل اللي ترد فينا الروح بعد الأيام العصيبة اللي عدينا فيها الفترة اللي فاتت.. بس دة ما يمنعش إن فيه شوية تفاصيل ما تطمنش أو يعني تقلق شوية.. بس خلونا نبدأ باللي يطمن..
النهاردة صدر بيان من حوالي فيه 39 مجموعة من المجموعات والتيارات المختلفة أهمها: "الدعوة السلفية، شباب الإخوان، الجماعة الإسلامية، حركة شباب 6 إبريل، حزب الجبهة الديمقراطى، واتحاد شباب ماسبيرو"، عنوانه "المصريون يد واحدة " لاستكمال أهداف الثورة".. البيان أكد إن ميدان التحرير مش حكر على حزب أو حركة، وإنه ملك لكل المصريين.. وأن الكل في الميدان جزء لا يتجزأ من الثورة.. ودعا لاحترام الإرادة الشعبية واعتبار أن مصر أولا وقبل أى شىء.. كما طالب باحترام حق الآخرين فى التعبير عن الرأى، وحذر من الأحداث اللي تفرق الثوار وختموا البيان، بإن ثوار مصر إيد واحدة وجمعة واحدة وخطيبا واحدا وإمام واحد.. ودة كلام جميل وكلام معقول ويشرح القلب ويطمن البال.. لكن في المقابل، في أخبار مش مؤكدة عمالة تجي لنا من هنا ومن هنا عن مجموعات وائتلافات بتفكر تنسحب من الميدان.. وعن صعوبة التنسيق بين الائتلافات الموجودة في الميدان وبين التيارات الاسلامية حوالين تأمين الميدان.. دة غير منشورات بدأت تتوزع النهاردة عليها مختومة بشعارات منسوبة للجماعة الإسلامية والدعوة السلفية وجماعة الإخوان المسلمين.. وبتدعو ل«مليونية الهوية الإسلامية»، و«رفض التمويل الأمريكي للأحزاب الليبرالية»، ورفض إقالة الدكتور عصام شرف، ومعارضة تأجيل الانتخابات البرلمانية، ورفض المبادئ فوق الدستورية
بلدنا بالمصري: أهالي المحروسة يناقشون جمعة لم الشمل
ليست هناك تعليقات:
إرسال تعليق